Тайландын Хаант Улсын нийслэл Бангкок хотноо саяхныг хүртэл энгийн л нэгэн өдрүүд үргэлжилсээр байсан юм.

Гэвч гуравдугаар сарын 28-ны өдөр Мьянмар Улсын хоёр дахь том хот Мандалайн орчимд 7.7 магнитудын хүчтэй газар хөдлөлт болж, хөрш орнууд болох Тайланд, Хятад улсын зарим бүс нутагт хүчтэй чичиргээ мэдрэгдэв.

Гэрэл зурагчны хувьд Б.Лхагвацэрэн ийм хэмжээний газар хөдлөлттэй нүүр тулж байсан удаагүй аж. Тиймээс нөхцөл байдлыг сурвалжлахаар шийджээ. Бангкок хотын оршин суугчид ч түүнтэй ижил. Учир нь Тайланд улсад сүүлийн 100 жилийн хугацаанд газар хөдлөлт болж байгаагүй юм.

Тус газар хөдлөлтийн дараа нийтийн тээврийг түр хугацаагаар хааснаар хотын автозамын хөдөлгөөн “тэг” зогсож, оршин суугчид барилгаас гарч айдас түгшүүрт автан хэсэг хугацаанд гадаа зогссон байна.

Тай ард түмний харцнаас тодхон гэрэлтдэг инээмсэглэл, баяр баясал байгалийн гамшигтай нүүр тулахад санаа зовнил, гайхшрал болон хувирсныг гэрэл зураг тайлбаргүй харуулжээ. 

Камер: Canon AE-1 Хальс: Kodak Ultramax 400